22e sonj

                2 rèv sa yo, avan gran entèval 597 jou an, ta sipoze fè m' konprann mwen gen yon lòt oryentasyon ; men Satan, nan mond Ksis la, nan mond sosyete sekrèt yo, te anpeche m' sezi bagay sa. Nan lane 2004, peyi a te cho ak mouvman sosyal ak politik, anpil rimè te gaye sou kouri ki pral genyen nan peyi a. Sou Tèren ksis, move espri ak mèt ksis ap fè mistik yon bò pou genbe Aristide sou pouvwa, alòke tou Satan ak menm move espri yo ap fè mistik yon lòt bò pou yon lòt gwoup ki te vle Aristide ale, sak pi rèd la, dèfwa, sou menm Tèren an.

                Sonj yo te fèt nan yon sikontans trè espesyal. Lucifer desann sou latè, li vin fè yon pati politik ; li chwazi m', pami yon ekip gwo zotobre nan pouvwa lavalas la, kòm moun ki pou redije règleman entèn pati politik sa, paske daprè li, Aristide tonbe, se nou menm li pral renmèt pouvwa a. Nou te plizyè ki te konn monte Tèren : Senatè, depite, avoka, kad nan lapolis, prèt katolik, ansyen otorite, sivil, elatriye. Te gen anpil jalouzi, anpil tretriz paske Lucifer fè chwa 2 moun ki pou chef pati a, mwen se te youn nan yo. Jodi a, mwen vin sezi ak konprann poukisa Lucifer te chwazi m' nan, vòlò, mantè a konnen destine m', li okouran sa m' pral ye, men mwen menm, m' pat konnen anyen. Mwen te nan fè nwa total, nan lobskirite ki pi dans ki te genyen. Antouka, paj sa tounen, epi kont rèy fè nwa a, paske youn nan misyon m' se ba mond lan limyè.

                Dat rèv yo echape m', men se te an 2004, jis avan yo te arete m' nan dat 24 me. Nan sousi pou m' te redije règleman entèn nan, mwen te fè anpil rechèch nan règleman entèn lòt pati politik yo ; konsa mwen te komanse ap rasanble sa m' te jwenn kòm done. Jou sa, mwen te sou kabann lakay mwen, ak yon laptop mwen te genyen, tektek m' ap tape grenn pa grenn mo pou m' fè djob Lucifer te konfye m' nan. Se konsa yon ti dòmi pral vole m', li te ka nan 11 zè nan lasware, mwen te kouche sou do, epi yon men pral pran pye dwat mwen, li deplase l' ak yon fòs gason, li mete l' nan plas pye goch mwen, se kòm si moun ki touche pye m' nan ta enève.

                Epi m' pantan. Fwa sa lè m' pantan an, mwen te toujou santi men moun nan nan pye m'. Sa te fè m' pè paske m' di : << Mwen fè yon rèv, yon moun touche pye m', epi malgre m' reveye, m' toujou santi men moun nan ! >>
Sansasyon men an, nan pye m' nan, te rete pou yon bon bout tan, jiskaske yo te arete nan dat 24 me 2004.

Haïti : Lumière des nations
Capitale politique et spirituelle du monde