2e sonj

                Nan dat 3 jiyè 2004, mwen te trè tris, paske se te anivèsè grenn pitit fi m' ; mwen pat bò kote l' pou m' te fete ak li. Mwen tap panse ak konsekans saka genyen nan relasyon nou tout lajounen 2 jiyè, paske m' te nan prizon. Men sa m' te wè byen bonè nan maten 3 jiyè :

                Lè m' rekonèt mwen nan sonj lan, m' te wè m' Sen - Rafayèl, nan vil kote m' fèt ; se yon zòn ki gen anpil pawòl mistik nou grandi nap tande y' ap di sou li, tankou nan Patriach, nan gwòt, yo di Sen an toujou mare anndan l', basen zèpeng, basen (dèyè kay) Telegran, elatriye. Men sit ki te enterese m' nan rèv la se Basen zèpeng ak yon lòt ki ta devan basen Telegran, li rele lekol Matye. Se nan lekòl sa m fè 4 premye klas primè m'.

                Basen zèpeng ak Patriach se 2 sit bò kay Adherbal LHERISSON ; premye a se yon rivyè ki pase ak dòmi anba kay la, mwen konn tande yap di moun konn desann anba dlo a, yo fè plizyè jou ; dezyèm nan se yon abitasyon, rivyè a pase bò kote l', depi m' piti map gade, map tande yap pale tout koze sou li, menm si m' pa janm gen prèv yo.

                Jou 3 jiyè a, vè 3 zè nan maten, nan sonj lan, m' te rekonèt mwen tou prè yon kanal m' te konn benyen ladan l' lè m' te piti, se yon kanal ki lage dlo nan yon trou pou l' tonbe nan larivyè nou sot pale de li a, dlo kanal la jete a pase anba l', sa ki vin bay yon pasrel, yon ti wout ki pèmet moun pase sou kote kanal la pou yo ale anba larivyè. Se nan ti wout sa gen yon bagay etranj pi pral rive soudènman.

                Mwen wè parèt devan m' 3 cheval, 2 nan yo te nwa, lòt la te gri ; te gen 3 blan ki te sou yo. Devan cheval yo te gen 2 lye, 2 sit diferan ; youn nan kè m', nan rèv la, se te lèzetazini, li te nan zòn Basen zèpeng nou te dekri talè a : Sit sa te bèl anpil, anpil, vè tankou poro, te gen lavi. Lòt sit la menm, se te tou lekontrè : ravage, piye, lamizè, li te sanble ak yon dezè ; pou mwen nan sonj lan, se te Haïti. 3 cheval yo te gwo anpil, won tankou yon boul ; gwosè yo te atire atansyon m', sa te fè m' di : << Cheval sa yo t'ap byen manje, kade kòman yo gra ! >> Yap avanse, yap avanse pou yo ale nan zòn ki te vè a, ki te bèl anpil la, kidonk lèzetazini ; lè yo rive nan ti wout la, youn nan 2 ki te sou cheval nwa yo jete nan kanal la lòt ki te sou cheval gri an. Yon ti kadè, m' wè m' monte cheval la, mwen dirije m' vè Haïti, kidonk nan zòn ki te ravage a, ki te sanble ak lanfè sou tè a. Men sa ki te banm plis pwoblèm nan sonj lan, 2 lòt blan ki te sou 2 cheval nwa yo pa montre okenn interè pou lòt la yo te trayi a, ki te sou cheval gri a, okenn pitye, se kòm si yo pat toulètwa ansanm. San okenn sousi, yo pran direksyon zòn ki te bèl anpil la, men mwen, ak lòt cheval gri a, mwen te pran wout pou m' ale nan zòn lekòl Matye a. Men m pat rive, nan mwatye wout, mwen te retounen ak cheval la.

Haïti : Lumière des nations
Capitale politique et spirituelle du monde