Sispann di blan yo echwe !

Pèp ayisyen, tande  byen !

Swit - 10

Sispann di blan yo echwe !

Absoliman.

Paske pou mwen menm, siksè yon nanm sou tè sa depann de si li atenn ideyal tèrès li ki se : << Chache Bondye epi jwenn li. >> Sa pa gen anyen pou wè ak relijyon ni ak richès materyèl.

Lè n' konsidere sa lèzòm rele siksè, n'ap di yon moun fè siksè lè l' atenn yon objektif li te fikse tèt li, lè l' reyisi nan yon misyon yo te konfye l'. Kidonk, avan nou di OEA, Nations - Unies, les États-Unis, Core group... echwe, fè n' ta konnen ki misyon yo te genyen. 

Aksyon ak pawòl moun sa yo de grenn gòch ; sa yo di lajounen se pa li yo di lannwit ; sa laprès yo relate se pa sa y'ap fè vrèman, kidonk devan laprès, yo la pou ede, men dèyè kamera yo vòlò yo piye. 

Pa egzanp, nan ka Haiti, gen 2 jan nou ka konsidere fè yo, kidonk gen 2 opinyon ki ka degaje si nou konsidere reyalite sosyopolitik Haiti. Premye opinyon an, se pa ensense yo ; nan gwoup sa, ou jwenn ekspè nan tout syans, anpil nan yo se Mèt ou doktè, yo nan tout sektè tou, notamman nan laprès, elatriye. Nanm animal sa yo pa konprann sak' yon peyi, sinon definisyon loksidan mete nan tèt yo, epi yo panse pwoblem Haiti, se yon pwoblem rasyonèl. Nan kan sa, menm sila yo ki sanble gen yon dimansyon pou sezi aspè diferan lavi livre tèt yo nan yon espirityalite malefik, epi asosye donk laveni peyi a ak yon ekip ti lwa sal nan vaudou. 

2e opinyon an, se pa nanm sanse yo, ki gen limyè espirityèl sou lavni diven peyi a, epi ki di lèzetazini, lafrans, elatriye, mèsi paske yo fè siksè nan kad misyon yo te genyen pou yo te fè nou dènye pou n' vin premye ; lèzetazini ak lafrans se 2 prensipal enstriman pinisyon nou, kidonk se 2 prensipal enmi nou tou. Yo pat janm la pou ede nou, yo te pito la pou fouye fòs nou. E yo ranpli misyon sa trè byen ; yo tèlman akonpli l' byen, yo fè pase sa pwofesi te mande yo fè. Kidonk, yo fè gwo gwo siksè. 

Nan sans sa, se nanm san limyè ki pou di kominote entènasyonal la echwe an Haiti. Avan ou di yon moun echwe, chache konnen ki misyon li te genyen.

Okeu !

Evintz BRILLANT (09082022)